2012 ning April (4) ya jahpawt hkying (9:30)am aten kawn shana maga hkying (2:00)pm aten laman, KIA Masat (5) Dap Ba ginra, Gang Dau Yang kaw nna Npawn mare maga hpyen n-gun jat na matu lai lung wa ai Tat Ma Masat (88) na hpyen hpung ni ngu maram lu ai hpyen n-gun (120) daram hte KIA Masat (255) Dap Nawng, Dap Dung na hpyen hpung ni Salang Lajawn Ngan Seng a Rubber sun makau kaw gasat poi byin ai lam chye lu ai.

Gasat poi byin ai shara hta Myen Hpyen Dap maga de na si, hkala hkrum ai lam, ram daw law ai hpe chye lu ai.

Ya ten, Myen Hpyen Dap Ts.K.Hk Masat (21), Tat Ma Masat (88) na hpyen n-gun yawng (600) daram Gang Dau Yang hte Npawn mare hta du nga ai rai nna, hpyen yen mat ai mung mare masha ni a dusat yam nga ni hpe kam ai hku sat sha, dum nta ni hpe mung wan nat jahten ya ai lam matut galaw nga ai hpe chye lu ai.

UN garum ningtum hpung ni gaw daini 2012 ning April shata praw (2) ya shana de daw maga hkying (6:00)pm aten hta, Sin Praw Ginwa Ginjaw, Mai Ja Yang hte makau grup yin hkan e shanu shingbyi nga ai, hpyen yen masha ni hpe No.2 lang ngu na sa du garum madi shadaw la lai wa sai lam shiga na chye lu ga ai.

Mungkan Garum Ningtum hpung ni hpe UNOCHA kaw na Miss Barbara Manzi woi awn ai rai nna, garum ningtum gunrai madaw (6) lawm ai lam hpe matut na chye lu ga ai.

Du sa ai UNOCHA, UNICEF, UNHCR hte WFP wuhpung ni kawn, n'gu, sau, jum, hpun palawng, di mala, shat ban, shat wan ni hte Ma kaji ni a matu malu masha ni hpe sa du garum lai wa sai lam shiga na chye lu ga ai.

Daini (2.4.2012) Bat langai ya, (3:00 pm - 4:00 pm) lapran, Tokyo mare, Shinagawa, Myen Mungdan Dat Kasa/ Hkanse Rung shawng kaw, Japan Mungdan du Jinghpaw Wunpawng Myu tsaw Mung tsaw share shagan ni hte kaga amyu bawsang mung masa wuhpung ni hku nna, Mungkan mungdan shara shagu kaw chyam bra shajang nga ai amyu sha ni yawng hte aten ahkying shani langai kaw sha, Wunpawng Mungdan kata kaw U Thein Sein Myen hpyen asuya ni gaw, Mungkan Wunpawng hpung (UN) kaw nna, tara shang tsep kawp pat hkum shingdang tawn da ai shinggyim ahkaw ahkang ni hpe ladu lanang tawt lai let, Amyu sha ni hpe amyu shamyit masing hte sat nat roi rip dip sha nga ai, Sagu la hpyi hpun nna Hkanghkyi Rawngba asuya ni hpe myit hkrum lahkrip ra ra hte ningmu amyu myu hku nna tsun sanglang hpyi shawn shajang let laja lana ninghkap n-gun madun lai mat wa masai lam chye lu ai.

Since June 9th, 2011 when the Burma Army (Thatmadaw) broke cease-fire agreement and began
military assault against the Kachin Independence Army, several meetings have been held with
members of State and Union Governments to reduce military tension. Though President Thein Sein
ordered his troops to stop military offensives on December 10 th, 2011, hundreds of clashes continue to
erupt in Kachin regions, to date.

Wunpawng Mungdan Shanglawt Asuya up hkang ginra rai nga ai N Pawn mare de myen hpyen asuya a hka-ma-ya (390) na hpyen hpung ni gaw March (28) ya shani hkying (4:45pm) ten hta laknak kaba ni gap sharu bun ai hte mare masha ni a n ta (4) tup hpe mung wan nat kau ya lai wa ai lam shiga na chye lu ai.

2012 ning march shata  (25) ya shani hta mung myen hpyen hpung ni gaw Nansanyang mare hpe wan nat kau ya lai wa sai re.

Nat kau ya hkrum ai n’ta ni gaw.

1. Jan Mali Hkawn Bu a nta
2. Slg. Mali Tawng a nta
3. Jan Ban Mun a nta
4. Slg. Gyung Dau a nta
5. Slg. Mali Tu Hke a nta,
6. Slg. Gawlu Brang Tawng a (Ah Me Ein) manam jarawp ni rai ma ai.

Laga ni na mying gaw atsawm n’lu sagawn shi ai re.

Ta Law Gyi mare (Jinghpaw Lawk)

2012 March shata 27 ya shani hta Myen hpyen dap Hk.L.Y (37) dap ni gaw (TAT MADAW NE) masat n’htoi ga baw hte Ta Law Gyi mare (Jinghpaw Lawk) maga Laknak kaba gap bun ai majaw, Slg. La Bung a kashu la kasha (asak 12 ning) a lata kaw pala wa hkra ai majaw lata daw mat ai lam na chye lu ai.  Dai sinat kaba a majaw sha Srn Ah Ja a n-ta mung hten za mat sai hte, Slg. Manam La a dum su leng mung hten za mat ai lam na chye lu ai

KIA Masat (5) Dap Ba ginra

Wunpawng mungdan shang lawt asuaya, KIA Masat (5) Dap Ba ginra, Gang Dau Du maga du nga ai Myen Hpyen Dap, Hk.M.Y Masat (390,385,380) na pawng hpawm hpyen hpung ni hte KIA Masat (255) Dap Nawng, Dap Dung na hpyen hpung ni Wa Hpya mare maga gasat poi byin ai lam chye lu ai.

UN garum ningtum hpung ni gaw March (27,28) ya shani ni hta Jinghpaw wunpawng Mungdan Dap Ba 3 ginra rai nga ai Mai Ja Yang mare hte grup yin ni hta du shing byi nga ai hpyen yen tsinyam masha ni hpe sa du garum lai wa ai lam shiga na chye lu ai. UN garum ningtum hpung ni kawn Mai Ja Yang mare hte grup yin hkan du nga ai hpyen yen tsim yam ni hpe shata mi na matu n-gu, jum, sau, shapre, hpun n'ba hte ma kaji ni a matu ra nga ai arung arai n'kau ni hpe wa garum ya lai wa sai lam shiga na chye lu ai.

Ya na zawn rai wa garum ai hta, masha 5/6 rai jawm nga jawm shadu sha rai nga ai ni hpe gaw grau na dinghku rai rai nga ai di mala hkawan, n'ba hte malu masha ni hte garum la lai wa sai zawn, masha 2/3 sha rai jawm nga jawm shadu sha re ai ni hpe gaw n'gu hte sau ni hpe garan jaw lai wa sai lam matut na chye lu ga ai.

UN ni gaw kun rai htaw Mawdaw kaba 4 hte mawdaw kaji 4 rai na tsin yam dabang di rai sa du garum lai wa sai lam na chye lu ga ai.

Denmark mungdan Aero mare hta shanu nga ai Jinghpaw Wunpawng myusha ni hte hpunau hkang myusha ni gum hpawn let Karai Kasang a chyeju san san a majaw sha jawm hpaw ninghtan da ai ( ACF) Aero Christian Fellowship Myanmar gaw, majan a majaw tinang dum n'ta ni hpe kau da let hprawng hkawn ra nga ai hpyen tsin yam hkrum jinghpaw wunpawng myusha ni a matu Denmark gumhpraw 5500 kr, Myen gumhpraw lap 700000 tup hpe March shata 25 ya laban shani hta garum jaw lai wa sai lam shiga na lu ai.

N'law la ai rai tim n'dai garum gumhpraw hpe gaw ( ACF) Aero Christian Fellowship Myanmar, hpung masha ni nan lit la let, grau na yak hkak jam jau nga ai tsinyam dabang ni de ading taw jaw garum mat wa na re lam matut na chye lu ga ai.

Ja gumhpraw hte n'lu garum la ai ten ni hta rai tim ( ACF) Aero Christian Fellowship Myanmar, hpung masha ni gaw tut nawng e Akyu hpyi ai hte garum shingtau nga ai hte du na ra ai ten ni hta mung dang di dang dep ai n'gun a tsam hte matut garum mat wa na re lam shiga na lu ai.

Wunpawng Mungdan Shanglawt Asuya Dap Ba (3) Ginra rai nga ai Mai Ja Yang hte Loi Je mare lapran kaw March (24) ya shani myen hpyen hpung ni hte KIA myu tsaw share shagan ni laja lana gap gasat lai wa sai lam shiaga na chye lu ai. N dai zawn gap gasat ai hta myen hpyen maga na tat-yin-mu (Dap Up) langai hkrat lai wa sai lam hpe mung na chye lu ai.

2012 ning March (25) ya shani hkying (9:30)am aten kawn kying (12:00)am aten laman, KIA Masat (5) Dap Ba ginra, Dum Bang Bum kaw nna Nam San Yang de htu lung wa ai, Myen Hpyen Dap, Hk.M.Y Masat (388) na hpyen hpung ni hpe KIA Masat (5) Dap Ba na hpyen hpung ni hkap shingla gasat ai kaw nna gasat poi byin ai lam chye lu ai.Gasat poi byin ai shara hta lahkawng maga de na si, hkala hkrum ai lam atsawm n chye lu ai.

Myen Hpyen ni, Nam San Yang mare kata de shang nna, Kahtawlik(RC) nawku jawng makau grup yin na, Mung mare masha ni a dum nta (3) daram nat kau ya ai hta n-ga laknak kaba hte majoi gap jahten kau ya ai lam hpe mung, matut na chye lu ai.

Dap Ba (3) Ginra rai nga ai Lagat Bum Post hpe March (24) ya jahpawt daw hta myen hpyen hpung ni n gun kaba hte shang htim ai majaw gan yen kau ra ai lam na chye lu ai. Dai shana sha (March 24) ya shana maga KIA myu tsaw share shagan ni kawn n gun hte bai lu htim zing madu la sai lam shiga hpe mung na chye lu ai. Gasat majan kata lam shiga hpe gaw a tsawm hkrak rai n chye lu shi ai.

American munghpawm mungdan kata na mare kaba 67 ni hta shanu nga ai Myu baw sang ni kawn Myen mungdan kata amyu baw sang ni shanu nga ai ginra hkan e byin nga ai myen hpyen ni a shinggyim ahkaw ahkang taw lai nga ai lam hpe jahkring ya na matu myen mung lithkam lahta tsang datkasa
Derek Mitchell hpang de lata masat lekmak htu da ai laika hte hpyi shawn dat sai re.

N'dai laika hpe Myen mung akyu ara a matu shakut nga ai US Campaign for Burma kaw na U Aung Din, Karen Myushayi langai hte Jinghpaw Myusha Slg. Gum San ni gaw March shata 22 ya shani hta Derek Mitchell hte tatut hkrum shaga let jaw bang dat sai re.