Dai ni ( 25.July.2011 ) ya shana de daw maga kaw na Nam San Yang makau hta Wunpawng Mungdan Shanglawt hpyen hpung hte myen tai hpyen ni a lapran majan bai byin hpang wa sai re, majan hta myen hpyen ni maga de na hkrat sum ai lam kaji gajaw byin hpang nga sai lam mung matut na chye lu ga ai.
Ma ni ( 24.July.2011 )ya jahpawt daw kaw na byin nga ai Dung (5) ginra hta gaw gasat gala ai lam matut manoi byin nga ai hta Shwe Gu Ginwang hta dap jung da ai myen hpyen dap Hka La Ya (141), (142) sha n ga laga myen hpyen hpung (5) ram bai jat bang wa sai lam shiga na chye lu ga ai.
Dung (10) ginra rai nga ai Chihpwi maga de mung Wunpawng Mungdan Shanglawt hpyen hpung hte myen tai hpyen ni gasat nga ma ai lam shiga na chye lu ai.
Norway Mungdan a mare daju Oslo hta daini ( 22.july.2011 ) ya shani e laja lana bawm kapaw ai lam byin wa sai re. Bawm hpe gadai kapaw ai hpe gaw sawk tam n'lu shi ai raitim, bawm kapaw ai hta yawm htum masha 7 si hkrum n'na 15 daram hkala lai wa sai lam na chye lu ga ai.
Bawm kapaw ai shara gaw Norway mungdan asuya a ningbaw ( prime minister Jens Stoltenberg ) a rung shawng kaw re lam matut na chye lu ga ai.
Bawm kapaw ai hta Prime Minister Jens Stoltenberg wa gaw hkala ai lam n'nga tim rung shawng na chyinghka ni hte hkuwawt ni gaw bawm n'gun nau ja ai a majaw ga malawng mat sai lam na chye lu ga ai.
Myen Tai Hpyen ni gaw mana de hkying 8:30 pm ( 21.july.2011 ) kaw na Laiza mare de laknak kaba ni hte gap bang nga ai lam na chye lu ga ai. Ya na zawn laknak kaba ni hte gap hpang wa ai hpang Nayi hkum myi laman hta sha myawk si 20 jan gap bang lai wa sai re. Madung gap bang nga ai shara gaw Myutsaw brang ni shara la da nga ai Dung 24 shara de re lam na chye lu ga ai.
Myen ni gaw ya shan hte du taw ai shara Daw Hpum Yang kaw na ( 120 mm ) hte gap bang ai re. Myawk si ni gaw Laiza hte deng mi daram sha tsan ai shara hta hkrat kapaw nga ai lam na chye lu ga ai.
Laiza mare na buga masha ni hte hpyen hprawng tsin yam masha ni yawng mung Miwa ga maga de hprawng shang na matu rai shajin let jin jin rai aten tup maja nga ma ai lam na chye lu ga ai.
Dapba 3, Dapdung 15 ginra Sang Gang hta e daihpawt manap 8:00 daram hta Myutsaw brang ni hte Myen tai hpyen ni majan byin lai wa sai re.N'dai majan hta Myen de na ( 6 ) hkrat sum sai lam na chye lu ga ai.
Myitkyina Manmaw lam na Ga Ra Yang hte Kasu mare lapran na Pung Mwi Hka mahkrai hpe Myutsaw Brang ni mana de daw hta bawm kapaw di kau sai re.
N'dai laman hta Jinghpaw mung kata e Myen tai hpyen ni grai shamu shamawt nga ai hte Myen hpyen ni kaw na shanglawt hpe majan kaba bai hpaw gasat wa na masa nga ai majaw, ya na zawn Pung Mwi Hka mahkrai hpe kapaw di kau ai lam rai na re nga na buga masha ni sawn shajang nga ma ai na chye lu ga ai.
Myen hpyen hpung ni gaw Jinghpaw Mung hte Sam Mung shara ni hta Poter grai lahkawn nga ai re. Ya na zawn Mare shagu hta Myen ni Poter shang lahkawn nga ai hta law malawng gaw Num Ma ni hpe lahkawn la nga ai lam na chye lu ga ai.
Myen hpyen hpung ni gaw mare hkan e La ( Wa ngan ) ni hpe mu jang mara kata hpyen re nga na majoi jep zingri adup gayet ai a majaw tinang a mare kata hta n'nga gwi mat ai sha nam maling hkan e sha hprawng shingbyi mat ma ai majaw ya na zawn mare hta ngam nga ai Num Ma ni hpe poter lahkawn la nga ai re lam buga masha ni hpe lakap let na chye lu ga ai.
RSS Feed