Myen gumshen hpyen Asuya gaw lai wa sai June shata praw ( 9 ) ya 2011 hta Ta hkaw hka Wan jak masing hpe jahpai n'na Jinghpaw Wunpawng Myusha ni a n'tsa majan hpaw sinat gap hpang wa sai re.

Ya na zawn Myen gumshen hpyen a majaw byin hpang wa ai "Myen hte shanglawt" a dinghku majan kata hta Myen gumshen hpyen ni gaw mara kata mungchying sha ni hpe ma ja e a dup gayet zingri sat, hkum shan roi rip, Poter lahkawn rai lam magup hku na jahte tam zingri nga sai re.

DUNG (7) NI MATUT GAP NGA

KIA Dung (7) ginra, Sumpra Bum Mare a sinpraw maga Hkrang Hka makau Mile shadaw masat 90/7 kaw KIA bawm hte myen hpyen la (2) si nna (2) hkala kaba hkrum ai lam hte KIA hte myen tai hpyen hpung ni gap hkat nga ding yang re lam shawng lam de na shiga shang wa ai.

MYEN HPYEN NI A ZINGRI HKRUM

Wai Maw mare makau, Wu Yang mare na Slg. Um Tang, Slg. Lisu Yaw hte manang (1) hpe myen hpyen dap Hka La Ya (58) kaw na ni rim la mat wa ai hta marai langai hpe sat kau nna marai lahkawng hpe a dup zingri let na lahkawng maga gadoi di kau ya lai lam buga masha ni kawn shana wa ai.

"A" Lu ai Share Shagan

Shd: Gawmaw Chang Ying da, Shawng lam magam gun shaja;

Sau Chang, Lama Doi Kasha B'lawng kawng Munghka pa e nga;

Yi sun Hkauna galaw sha, Nu yan Wa hpe kau tawn da.

Mungdan a Magam gun ai, Share shagan wa shi tai;

Sak 22 sha naw rai, Sumtsaw pyi rai n da shai;

Hkum ashan naw hkalung tim, Myu Tsaw sai gaw majing grim.

2011 June 9 ya, Manap jau jau hkying 5 hta;

Tai Hpyen wa e rim magra, Shi chyu ginrai myit shaja;

Matse labye dusat wa, Hpya lu hpya sha sat kau ya.

Myit magaw dik ai Tai Hpyen, Nachying mazut ai lailen;

Tsawmmari hpyi la yang she, Chang Ying a moi mang gale;

Oh! Sai pyi hkyet hkra chyup kau ya, Sharaw hta grau ai masa.

Matsan mayan zingri hkrum, Kaning rai she shi shoi Chyum;

Madu Yesu hte bung ai, Yawn hkyen lam htum hkra hkam sai;

Mara kata shi si ai, Raitim, Shi bai hkrung rawt sai.

Tawk! Tai hpyen wa a akyang dai, Matse sa ai nau hpyau ai;

Amyit kata sai prut pru, She mani hkra tawk kau m'yu,

Masha Shada roi rip ai, Maroi nni dik nngai.

Chang Ying e - Na a malai manang ni, Matai dawp ya na ready;

Masin nsi hkum rai law, Mara dat kau ya u yaw;

Lamu Kasa Lata hta, Na a wenyi ap saga,

Sumsing l'mu de wa nu yaw, Shagrau sha-a ga ai law.

Madu Yesu a Lahpyen, Mungkan ga de hkum majen,

Nang hpe anhte shagrau ai, Nang hpe Hkungga jaw ga ai;

Htani htana Ja Mung dan, Gingdan ai share Shagan.